Ka një listë të gjatë grash që çdo vit vriten nga burrat apo partnerët e megjithate nuk ka një motiv të vetëm të dhunës ndaj grave – qoftë abuzim emocional, sulm fizik, sulm seksual ose përdhunim, ose forma më ekstreme që kulmojnë me vetëvrasje - dëshmitë më të fundit ndërkombëtare tregojnë se disa faktorë vazhdimisht parashikojnë nivele më të larta të kësaj dhune. Së bashku me rolet stereotipike gjinore, marrëdhëniet dhe identitetet, këta faktorë përfshijnë mosrespektimin dhe armiqësinë ndaj grave, marrëdhëniet e pabarabarta ose kontrolluese dhe mbështetje të ulët për barazinë gjinore. Kjo dëshmi tregon se dhuna ndaj grave është një fenomen gjinor dhe normat shoqërore që e motivojnë atë përthithen në një moshë shumë të hershme. Studime të shumta kanë zbuluar se dhuna ndaj grave është e parandalueshme dhe se puna me fëmijët dhe të rinjtë është thelbësore për parandalimin e saj.
Stereotipet gjinore të vjetëruara nguliten te fëmijët që nga fillimi i zhvillimit të tyre. Ne mund t'u themi fëmijëve tanë se "çunat nuk qajnë" kur shprehin emocionet e tyre, ose i quajmë vajzat "garipe" kur pozicionojnë veten e tyre. Mund të duken vogëlsira, por gjuha se si flasim me fëmijët ka rëndësi. Këto dhe shprehje të tjera delikate të stereotipeve gjinore që fëmijët i përthithin mund të formojnë qëndrime problematkie në moshën e rritur. Ideja “burri është burrë”, në marrëdhëniet intime, mund të përkthehen në idenë se burri është nën "kontroll", e që më pas mund të çojë në sjellje kontrolluese, abuzive dhe të dhunshme ndaj grave. Idetë e ngurta rreth mashkullorisë gjithashtu kufizojnë jetën e djemve dhe burrave.
Kur sfidojmë stereotipet gjinore ne u japim fëmijëve tanë mesazhin se mund të jenë ata që duan të jenë, se nuk duhet të merren me stereotipe kufizuese dhe "rregulla" për "çfarë mund të bëjnë vajzat" ose "çfarë janë djemtë ". Në planin afatgjatë, duke punuar me fëmijët për të sfiduar stereotipet gjinore, ne gjithashtu kontribuojmë në parandalimin e dhunës ndaj grave në gjeneratën e ardhshme.
Parandalimi i kësaj dhune ka nevojë për një strategji shumë më të sofistikuar sesa thjesht t'u thuash njerëzve se është "e papranueshme". Provat thonë se nxitësit e kësaj dhune janë shumë më të ngulitur në shoqëri. Pra, pjesë e punës që duhet të bëjmë për ta parandaluar atë përfshin sfidimin e modelit të gjuhës dhe qëndrimeve që forcojnë stereotipet gjinore dhe pabarazinë.